خاطرة بنت سورية لحبيبها المعتقل …وآه ه ه ه ه يا بلد / كل عيد حب و انت بخير

من بعدما انفئدت بكم يوم و رفئاتك بلشو يدورو عليك و كتبو عالفيس بوك انك مو مبين.. انئهرت كتير.. انئهرت متل كل محبينك…. و ما بتسدء أديش ارتحت وئت عرفت انو انعرف وينك و انك عايش ! عايش عم تتنفس.. انشالله تكون بسرداب بس المهم عايش

بعد فترة بلشت فرحتي تخف.. صرت اسأل حالي وينك.. طولت كتييير… حكيت مع إمك أكتر من مرة.. و وعدتني بس يصير شي جديد تخبرني.. بس ماعم يصير شي جديد غير إنو عم ينئلوك من مكان لمكان…. بكرا انشالله بدي ارجع احكي مع إمك.. بركي بتخبرني شي حلو

بتمر عليي ليالي ببكي بحرئة و بحسرة من كتر مو مشتائتلك و مستوحشتلك.. بتزكر وئت كنا حلوين سوا و كل ضحكة ضحكناها… بنسى المشاكل و المعاتبات و النقاشات العقيمة.. بنسى الفراق و بنسى البرود يلي صار بآخر كم مرة شفنا بعض فيهون..

برجع بزكر حالي إنو لازم ما انسى.. لازم اتزكر انو نحنا خلصنا… و إنو يمكن بس ترجع انت تكون لساتك على موقفك متل ما تركتك آخر مرة و ارجع انصدم و يتحطم خيالي الحلو بالواقع

الدنية فالنتاين… بتتزكر شو ساوينا بالفالنتاين من سنتين ! بتتزكر ضحكاتنا و بسطنا يلي خلو كل حدا يئعد جنبنا عالطاولة يئوم بعد بخمس دئايئ ****** من كتر ما يحس بالإحراج و قلة الإنسجام مع حبيبو جنبنا ! و كيف صورونا و نزلت الصورة بالمجلة, و جنيت لحتى جبتا.. و سجلولك إسمك غلط تلت مرات ههههههه
عكل حال.. هداك كان أحلى فالنتاين مر عليي لعلمك يعني

هي وحدة من الليالي يلي بتمر عليي كتير صعبة…. كنت عطول اسكت و ئول لحالي بس يطلع بحكيلو ياهن شخصي, اذا كان الوضع بيسمح احكيلك ياهن
يس اليوم قررت اكتب.. مابعرف ليش
يس أنا متأكدة وئت بشتئلك بتكون مشتئلي.. و وئت بفكر فيك بتكون عم تفكر فيني

بحياتك مارح تكون أيا حدا.. ولا رح تشبه حدا..ولا رح تكون حبيب عادي
أنت أب و أخ و صديق ئبل ما تكون حبيب
عئولتك وئت بتئلي.. no one is like you
كل عيد حب و انت بخير : )