مي سكاف: فيسبوكيات: من زمان اتصل فيني نجدة أنزور وكنت ماعم اشتغل متل العادة وطبعا أنا رح قول سر أنا حمارة.. لما كان في فرصة اتوظف بمديرية المسارح رفضت لأني قلت لحالي في رفقات إلي أبدى بعدين ندمت طبعا إنو شو هالنزاهة .. شخاخة وقاعدة بالنص ! ماعلينا .. القصة يلي بدي قولها هي : انو حكى معي نجدة وقلّي تشتغلي بالجزيرة مقدمة برنامج ..صفنت وفكرت إنو هاد العمل ممكن ينقذني ماديا .. عمل ثابت ومتواصل وما في تعب متل الدراما .. غبرة وقلة واجب .. وانتظار يلي بيسوى ويلي لأ .. وعالأغلب لأ .. ليشغلّك! بيخلص الواحد من مزاجية الشركات والمخرجين .. معلومكون أنا كان ينقال عني ( متعبة) اي أنا متعبة .وإلي الفخر.. بناقش وبحب اتنبى وما بقدر اتبنى إذا ما اقتنعت وآمنت بالشي يلي عم أعملو. وما بنكر إنو في استثناءات بشغلي اضطريت فيها اشتغل شي مو حاببتو لأسباب ماديّة بحتة. بلا طول سيرة .. صفنت بعرض نجدة وكنت رح وافق بعدين قررت إنو أنا ممثلة ورح الغي مهنتي إذا بدي انتقل لمعدّة ومقدمة برنامج حتى لو جابتلي استقرار مادي. بعد فترة .. بشوف لونا الشبل ومنشوفها كلنا بنفس البرنامج يلي انعرض عليي من قبل مين؟؟ نجدة. ن جدة أنزور .. صديق بشار الأسد الشخصي .. يلي كان تحت حراسة القصر بالأعمال يلي اشتغلناها معو .. ويلي كنا مرة عم نصوّر عمل بجبل مطل على سهل الغاب ..جنب مقام بيسموه مقام النبي جعفر يمكن .. اجا بشار واتغدى هو وصاحباتو مع نجدة .. نجدة أنزور  يلي بدي قولو عرّاب و …. و شريك أساسي من تحت الطاولة. نجدة أنزور من الجنود المجهولين يلي اشتغلوا شغل جبّار ومازالوا ب دعم بشار الأسد . نجدة أنزور مارح ننساك.