‘خربشات نورس محمد : هادا مو كفر يا أمي هادا عتب’
3 أيار (مايو - ماي)، 2016
2 minutes
شبك يا أمي
ما في شي
شبك
والله ما في شي
ما في شي واجريكي بالدم مغرئه
ما في شي وتيابك كلها مشئشئه
ما في شي ورواح ولادك بالسما معلئه
ما في شي وخناجر العالم جمسك مزئا
شلون ما في شي
الله كريم يا ابني، احمد ربنا
اي رب اللي بدي احمدو
نفس الرب اللي كلنا بنعبدو
نفس الرب اللي بدو يانا نسعدو
نفس الرب اللي وعد وما اجا بموعدو
اي رب اللي بدي احمدو
حرام عليك يا أبني، هادا اللي عم تقولو كفر
هادا مو كفر يا أمي هادا عتب
اللي لعاتب ربنا الف سبب وسبب
تأملت منو يشيل عنك الحزن والتعب
تأملت منو يحس فيكي بساعة غضب
هادا مو كفر يا أمي هادا عتب
الله هيك بدو يا ابني وهي حكمتو
ونعم بالله يا أمي ونعم بالله
خربشات نورس محمد – منتصف 2013
