توفيق الحلاق

من ذاكرة التلفزيون :
دخلت دكانا ليدلني صاحبه إلى فني ستالايت في منطقته . كان الرجل منهمكا في إصلاح ساعة يدوية . انتظرته حتى فطن لوجودي .

قلت : مرحبا .

أجاب وعليكم السلام .. نعم ؟ .

قلت : بتدلني من فضلك إلى محل لتركيب الستلايت .. الدش يعني ؟ شعرت أنه لم يفهم سؤالي فقلت : في حدا حواليك بيصلح تلفزيون في الحارة ؟

أجاب : مابعرف أنا مابشوف تلفزيون اسآل جاري ؟

كان جوابه فظا

فقلت له مبتسما : يعني مابتعرفني ؟

أجاب : ليش مين بتكون حضرتك ؟  ههههههههه

قلت : أنا مذيع في التلفزيون من عشرين سنة ما لمحتني ولامرة ؟

أجاب : لأ .

سألته : طيب عيلتك مرتك ولادك أهلك كمان مابيشوفوا تلفزيون ؟

أجاب : أصلا في حياتي ماحويت تلفزيون لا أنا ولاأهلي .

قلت : طيب بتقرا جرايد ؟

قال : أعود بالله .. أخي من آخرها أنا بقرا قرآن وبس .

قلت : طيب وكيف بتعرف أخبار البلد ؟

أجاب : إذا في شي بيهمني ولاد الخلال كتار بيخبروني .

كنت أعرف أنني ألعب بالنار لكن فضولي الصحفي هو الذي دفعني لذلك الحوار .

قلت : بدي إسألك ولاتزعل مني .. ليش محرم على حالك وعلى أهل بيتك تشوفوا التلفزيون ؟

قال بتحد : لأنو حرام .

قلت : كيف عرفت إنو حرام وإنتي ماشفتو لتحكم عليه ؟

قال : أخي نحنا عنا شيخ عالم شو بيقول أنا وأبي وإخواتي وولادي بنسمعلوا .

قلت : شو حكى الشيخ عن التلفزيون ؟

قال حرام لأنو مفسدة للولاد والنسوان .

قلت طيب بتوافق إنك تشوف برنامجي مرة وحدة وشوف بعينك إذا كان مفسدة ولا مفيد ؟

قال : قلتلك ماعندي تلفزيون .

قلت : أنا عازمك ليكو بيتي خمس دقايق مشي من هون .

أجاب : أخي مابقدر لشاور شيخي .!!!!

قلت : شاورو وهي رقم تلفوني إذا وافق أنا بجي باخدك اتفقنا ؟

قال : اتركها ع تيسير الله .

قلت : ونعم بالله .

اتصل بعد حوالي عشرة أيام : السلام عليكم كيفك أخي توفيق .. أنا الساعاتي اللي مابيشوف تلفزيون ..ضحك خفيف … ايمتى فينا نشوف برنامجك .. طلع شيخنا بيشوفو .. وعاجبو …ضحك …

اصطحبته إلى بيتي .. أطرق ولم يصافح زوجتي .. تابع برنامج السالب والموجب وكان موضوع الحلقة: سيدة صغيرة طردها والدها مع طفلتها من بيته لأنها على خلاف مع زوجها الذي كان قد طردها أيضا . وهي كانت تعيش مع عائلة فقيرة لجأت إليها . تابع الرجل قصة الفتاة ودمعت عيناه

وقال : حرام عليه هاظالم وين بدا تروح المسكينة .. والتفت إليّ : يخربيتو مافيه دم ؟ لك هي عرضو !! كيف بيسخا يقلعها العمى في عيونو . ثم سألني : شو عملتو فيها للبنت ؟

قلت : تولتها جمعية خيرية ورح يتصلو بأبوها وزوجها ليحلو المشكلة و إذا مامشي الحال بيرفعوا دعوى عليهم .

قال : الله يبارك فيكن … يمكن هلأ أبوها مابينام الليل بس يشوف بنتو ع التلفزيون !!

قلت له ضاحكا : هادا متلك مابيشوف تلفزيون !! ههههههههه