يعني هلأ وقفت على روحة الرئيس الفلسطيني محمود عباس للتعزية بشمعون بيريز؟

وليش ما يروح يعزي بلا صغرة؟ هل وصل الطرفان الى القطيعة التامة بين بعضهما البعض مثلا؟
يعني لما صارت اتفاقيات سلام بين الطرفين الفلسطيني والاسرائيلي كان الامر عادي وطبيعي ، وما كنش شمعون بيرز مجرم حرب؟
هلأ عم نكتشف شو عمل شمعون بيرز بالفلسطينيين بس بعد ما ودع؟
دخلكم ، شو هو يلي مش طبيعي بالعلاقة بين الطرفين لحتى الرئيس الفلسطيني ما يروح يعزي؟ هل تخلى الفلسطينيون عن اوسلو مثلا واعلنوا الكفاح المسلح
ضد الاحتلال ، وجاء محمود عباس وبعص هادا الاعلان لما راح على العزا ؟

يعني الفلسطينية بطلوا بدهم سلام مع اسرائيل ، ورجعوا جائزة نوبل للسلام يلي تقاسمها مرحومنا مع اسحاق رابين؟
يعني كل يلي ذكرناه اعلاه طبيعي وعادي، وبس للي مش طبيعي انو الرئيس يروح يعزي بوفاة بيريز؟

رجاء ما حدا يقعد يلعب على عقلنا ويوهمنا انها القضية قضية روحة الرئيس على عزا رئيس وزراء اسرائيلي سابق، هادا تفصيل مش بس ثانوي، لا، فهو تافه كمان!
وعلى قول أمي :” راح الجمل ، فلا اسف على الرسن”!