بالسوري الفصيح
6 أيلول (سبتمبر - شتنبر)، 2016
3 minutes
- فيه سوق جديد رح يفتح بهالكم يوم، ولازم تلملك قرشين منشان نروح نشتري شوية غراض بلكي نتسبب من وراهن.
- سوق شو هادا اللي بدو يفتح؟
- ولو يا زلمة، شو ما عم تشوف الأخبار؟
- مبلى عم شوف الأخبار، بس ما سمعت إنهن رح يفتحوا سوق جديد.
- لك ولو لا تجدبا
- والله ما عم اجدبا، نورني
- هادا يا سيدي، الشباب عملوا هدنة بداريا وطالعوا الناس والمسلحين
- أي سمعت هيك شي
- ولما طلعوا الناس من داريا شو تركوا
- والله ما بعرف، شو تركوا؟
- العمى انت حوبة بنوب، تركوا غراضهن يا فهمان.
- غراض شو؟
- غراض بيوتهن، غسالات برادات، تلفزيونات طناجر، كنبايات، وألعاب أطفال
- أي وشو دخل غراض الناس اللي تركوها بالسوق اللي عم تحكي عنو؟
- لااااااا انت خالص بنوب، ومانك عايش بالبلد
- لك عمي ماني خالص وأنا عايش بالبلد، متلي متلك بس ما عم افهم عليك
- إي حاجتك كيف عايش بالبلد، وما بتعرف شو رح يصير بغراض أهل داريا؟
- يعني ناس عملت هدنة وطلعت أكيد بعد فترة رح يرجعوا على بيوتهن مو هيك…
- يرجعوا لوين يا بعدي؟
- على بيوتهن
- بيوت شو سيد راسي، انسى، هي البيوت صارت بالماضي، يعني حبايبنا أهل داريا خلاص ما بقى تشوفهن بداريا، يمكن والله أعلم بتصير تشوفهن بشي بلد تاني…
- لك والله ما فهمت عليك، خيلتني…
- إي اسماع لكان: بعد ما طلعوا الناس من داريا، وراحوا شي على إدلب وشي ما بعرف لوين، فاتوا الشباب الطيبة وعفشوا البيوت…
- عفشوا البيوت، يعني تعفيش تعفيش
- إي تعفيش من الإبرة للبراد، ما خلوا فيها شي، حملوها بالسوزوكيات… وخلاص ما بقي غير الحيطان
- العمى… كيف هيك؟ على أساس الجيش حاميها…
- بالله شو، قلت لي حاميها، إي روح دبر شوية مصاري وخلينا نروح نشتري شوية غراض، نمشي فيهن حالنا… قلت لي حاميها… لك يا حبيبي حاميها حراميها… يا لطيف شو مخك سميك…
